Самарқанд давлат университети талабаси, дзюдо бўйича Осиё кубоги совриндори, икки карра Ўзбекистон чемпиони, Ўзбекистон миллий терма жамоаси аъзоси  Исроил Норбоев яқинда Дубай шаҳрида дзюдо бўйича бўлиб ўтган миллий терма жамоалар ўртасидаги мусобоқада олтин медални қўлга киритди.

    Биз Исроил Норбоевнинг мусобақа ҳақидаги фикрлари, келгусидаги режалари билан қизиқдик.

    - Мусобақадан олган таассуротларингиз қандай?

    - Мусобақа жуда яхши ўтди. Биз жамоа билан бирдамликда ҳаракат қилиб, доим бир-биримизни қўллаб-қувватлаб турдик ва якунда биринчи ўринни қўлга киритдик. Албатта, бунда мураббийларимизнинг ўрни катта.

    - Ватанимиз мадҳияси янграётганда нималарни ҳис қилдингиз?

    - Аввало, кўз олдимга ота-онам келади. Ватан бу оиладан бошланади, деб бежизга айтишмаганлиги рост экан, деб ўйлайман шунда. Биласизми, бу вақт кишида ҳаяжон, фахр, ифтихор, қувонч - ҳаммаси бирлашиб кетадиган пайт бўлади. Буни сўз билан тасвирлаб бериш қийин.

    - Спортга қандай қилиб кириб келгансиз?

    - Дадам фермерлик билан шуғулланади. Бир куни биз бозорга чорва молларини сотгани чиқдик. Ўшанда нотаниш спорт мураббийи дадамга фарзандингизни курашга беринг, ундан чемпион чиқади, деган маънода гапирганини эшитиб қолганман. Дадам ҳам менинг спортчи бўлишимни жуда хоҳлардилар. Шу воқеадан сўнг, мен спортга илк қадамимни қўйганман.

    - Машғулотлардан бўш вақтингизда нималар билан шуғулланасиз?

    - Бўш вақтимни янги усулларни ўрганишга сарфлайман. Машҳур дзюдочиларнинг курашини кўраман. Китоб ўқиш ҳам яхши кўрган машғулотларимдан бири.

    - Охирги ўқиган бадиий китобингиз қайси?

    - Сўнгги марта Абдулла Қодирийнинг “Ўткан кунлар” асарини мутолаа қилдим. Биламан, бу жуда машҳур китоб, киноси ҳам бор. Лекин мен асарни илк марта ўқидим. Ўзим учун кўпгина янги нарсаларни ўргандим.

    - Муваффақиятга эришиш учун энг аввало нима қилиш керак?

    - Энг аввало, ота-она ва устозларнинг розилиги ҳамда дуосини олиш керак. Ундан сўнг, тинимсиз меҳнат сизни тарбиялайди, жангга тайёрлайди. Машғулотда қанча қийин бўлса, жангда шунча осон бўлади.

    - Сизнинг идеалингиздаги спортчи ким?

    - Менга Самарқанд давлат университети битирувчиси, “Токио - 2020” Олимпиада ўйинлар бронза медали соҳиби Давлат Бобоновнинг курашлари, услуби, характери ёқади. Давлат Бобонов ака сифатида ҳам бизга йўл-йўриқ кўрсатиб туради.

    - Сиз нимадан куч оласиз?

    - Ота-онамнинг билдирган ишончи мен учун энг катта куч ва руҳлантириш.

    - Келажакдаги режаларингиз қандай?

    - Ҳозир 25 май куни Термизда ўтказиладиган Ўзбекистон кубогига тайёргарлик кўряпмиз. Худо хоҳласа яхши натижалар билан қайтамиз, деган умиддаман.

    - Тенгдошларингиз ва укаларингизга қандай дил сўзларингиз бор?

    - Энг аввало, ҳар бир инсон ўз олдига мақсад қўйиши, кейин ўша мақсад йўлида ҳаракат қилиши керак. Мақсадга эришиш осон бўлмайди, албатта. Лекин тинимсиз ва тўхтовсиз ҳаракат бизнинг олға силжишимизга хизмат қилади. Мен Самарқанд давлат университети талабаси эканлигимдан фахрланаман. Шу даргоҳга келганимдан сўнг, Осиё чемпиони бўлдим. Ўзим учун янги мураббийлар ва дўстлар орттирдим. Президентимиз ҳам, университетимиз ректори ҳам бизга барча шароитларни яратиб бермоқда. Бу имкониятлардан унумли фойдаланиш биз учун ҳам қарз, ҳам фарз бўлади. Эътиборингиз учун раҳмат!

 

 

Отабек Саъдуллаев,

Самарқанд давлат университети

Ахборот хизмати.

Шавкат Акрамов олган суратлар.