Самарқанд давлат универистети органик кимё кафедраси доценти Дилбар Тўраева университетнинг фахрий олималаридан.  Органик кимё мутахассислиги бўйича кимё фанлари номзоди. Олиманинг илмий фаолияти назарий ва синтетик органик кимё соҳасидаги фундаментал тадқиқотлардир. Илмий ишларини муваффақият билан олиб бориши натижасида органик кимёнинг ион-радикаллар соҳасида янги реакция усулларини кашф қилган. Мазкур кашфиёт органик кимё фанига қўшилган улкан ютуқ ҳисобланиб, жаҳон кимё жамияти томонидан тан олинган. Дилбар Тўраева Ню-Ёрк Фанлар академияси аъзоси. АҚШнинг Тринити университетида маърузалар ўтган. Россия, Италия, Франция, Белгия, Япония, Корея, Австралия каби давлатларда ўтказилган кимё бўйича халқаро конференция ва симпозиумларда иштирок этган. Кимё йўналишида 160 дан ортиқ мақолалар ва органик кимё фанидан бир қатор дарслик, ўқув ва услубий қўлланмалар муаллифи. Узоқ йиллар жаҳон кимёгар олимлари билан янги радикал ионли органик реакциялар ва физиологик фаол бирикмалар ва кимёвий реагентларни синтез қилиш усуллари бўйича грант лойиҳада иш олиб борган.