Самарқанд давлат университетида “Яшил макон” умуммиллий лойиҳаси бўйича тизимли ишлар амалга оширилмоқда. Ушбу лойиҳа ижросини таъминлаш мақсадида жорий йилнинг февраль ойига қадар 2 мингга яқин кўчат экилган эди. Каштан, липа, япон сафораси, Қрим қарағайи, қайрағоч каби турли манзарали, мевали дарахт ва бута кўчатлари шулар жумласидандир.

    “Яшил макон” умуммиллий лойиҳаси бўйича 24-27 февраль санасида Самарқанд давлат университети ректори, профессор, Олий Мажлис Сенати аъзоси Рустам Холмуродов ташаббуси билан Қўшработ туманида 1500 туп ўрик дарахти ўтқазилиб, СамДУ боғи яратилди.

    Бугун эса, Ургут туманида жойлашган Самарқанд давлат университетининг амалиёт ўташ ва соғломлаштириш оромгоҳида 500 тупга яқин мевали дарахт кўчатлари ўтқазилди.

    - Самарқанд давлат университетининг амалиёт ўташ ва соғломлаштириш оромгоҳида бугун ҳашар уюштирилди - дейди факультетлараро жисмоний маданият кафедраси досенти ва оромгоҳ директори Раъно Қосимова. – Бу ер асосан, биология, география ва экология факультети талабалари амалиёт ўташ учун мўлжалланган бўлиб, умумий майдони 3 гектарни ташкил этади. Оромгоҳимизда 10 мингга яқин ўсимлик бўлиб, шундан ўрик, гилос, беҳи, олча, шафтоли, асалат, жийда, тут, узум, олма, ёнғоқ каби уч мингга яқин мевали дарахт мавжуд. 2022 йил давомида жами мингга яқин кўчат ўтқазиш мўлжалланган.

Беҳруз Шамсиддинов

Самарқанд давлат университети

Ахборот хизмати ходими,

Шавкат Акрамов олган суратлар.