Рости, тарозига жуда кўп солдим,

Аслида қиймати кепак дунёнинг.,

Ва шуни англадим: яшашдан олдин

Пухта ўзлаштириш керак дунёни.

****

Англашга уриндим етганча қурбим,

Ишқнинг ҳисобига фалсафа қурдим.

Қонмадим ҳеч қайси жилвагар ҳурдин ―

Хуллас, севолмадим кесак дунёни.

****

Шаклим: икки оёқ, икки қўл бадан,

Умидвор тураркан мудом ўлжадан.

Митти жиғилдоним билан ўлчадим

Нафсимнинг хўраги ― емак дунёни.

****

Валекин қай мезон, қай бир хулоса

Қани энди кўнглим тўлдира олса...

Билдимки, мушкилдур қилмоқ муроса,

Англаш мумкин эмас, демак, дунёни!

Умаржон Химматов,

Самарқанд давлат университети

филология факултети талабаси