Қирғоғи торайган қутлуғ дарёга,

Шўнғидим, вужудим чўғлари ўчди.

Чўзилсам мўйсафид, мискин дунёга,

Кўнгилга пишқирган сокинлик кўчди.

****

Тасаввур қопини минг зарра мисол,

Сочиб юборсам мен етти иқлимга.

Ишқ дея аталган анави дажжол,

Кишан сололмайди бедор ақлимга.

****

Ортимдан эргашган сояни қувлаб,

Қошимга елиб кел, эй адойи қалб.

Кўнгилнинг кесилган торларин улаб,

Қонсиз қовжираган қорачиқдан балқ!

****

Қовурғам нигоҳи нафратга тўла,

Айрилиқ ҳасрати фақат унга хос.

Ёлғонга эврилган ҳақиқат ўлат.

Беғамлик кўлига чўкмоқда холос.

****

Рўёбга шайланган озурда тушнинг,

Қафаси нурайди тўрт томонидан.

Чўққида қаноти ғажилган қушнинг,

Дардини тингладим, томчи қонидан.

****

Тизлаган туйғунинг бошини ёрдим,

Кунлар тундек ўтар, ҳасрат бўлмаса.

Дардимни мўйсафид жомдан сипқордим.

Энди кўнгил тўлмас, қадаҳ тўлмаса.

Санжар Исомий