Эй кўнгил!

Эй кўнгил, шодликнинг томирин кесган,

Тиғмидим, сенга сўз ато этган он?

Ёки қуёшмидим, нур сочган ҳар ён,

Сўзни ғамга қориб, қалб томон эсган?

****

Эй кўнгил, бедорман, яллолар суриб,

Ҳақ томон бир бора юзланмади дил.

Тубсиз сархадсизлик аро ин қуриб,

Учиб чиқаолмай кечди неча йил.

****

Эй кўнгил, хазонлар оралаб юрган,

Бўғзида қон қотган журъатиммисан?

Ўзликни тополмай қаққайиб турган,

Ғорлигимдан мерос, суръатиммисан?

****

Эй кўнгил, қалбини нафс тушовлаган,

Хирсини опичлаб юрганни кўрдинг.

Фақирнинг ризқини чангаллаб еган,

Бир жонга минг сарой қурганни кўрдинг.

****

Эй кўнгил, кўзларим қарида туриб,

Шамширин қайраган ғанимсан менга.

Шоир пештоқини кўксига уриб,

Ичи бўшаб қолган танимсан менга.

****

Эй кўнгил нафас ол, айшинг сурмасанг,

Шоирга шодликлар нишин суқмайди.

Ўткинчи дунёга юзни бурмасанг,

Қуршаган танингдан шоир чиқмайди.

Санжар ИСОМИЙ

Самарқанд давлат университети

кимё факультети талабаси