Самарқанд давлат университети спорт фаолияти ва санъат факультети талабаси Жасур Алиевнинг “Ижод сеҳри” номли расмлар кўргазмаси бўлиб ўтди.

         Тадбирни СамДУ доценти Нигина Муллажонова очиб, Жасур Алиевнинг ижодий кўргазмаси ҳақида алоҳида маълумот берди. Кўргазмада 50 га яқин турли хил табиат манзаралари, натюрморт, портрет йўналишларда чизилган расмлар намойиш этилди.

         - Ўғлим ёшлигидан расм чизишга қизиқар эди. Кўпинча у гуллар тасвирини чизган, - дейди Жасурнинг отаси Камолиддин Алиев. – Ҳозир у ўзининг дастлабги кўргазмасини ўтказяпти. Кўриб турибман, Жасур жуда ҳам ҳаяжонда. Биласизми, мен ўғлимни Самарқанд давлат университетига ўқишга кирганида жуда хурсанд бўлганман. У ҳақиқий эркин ижодий муҳитда таҳсил олмоқда. Бугун яна бир бор бунинг гувоҳи бўлдим. Мен ўғлим билан фахрланаман.

         - Расм чизиш мен учун энг севимли машғулот. Мен ҳаттоки, бешикдаги жиянларимни ҳам расмини чизиб чиққанман, - дейди Жасур Алиев. -  Умуман менинг расcом бўлишимга коллежда ўқиётган пайтим қарши чиқишган. Ўшанда ўқитувчим мендан рассом чиқмаслигини айтган. Бу менга оғир ботган. Ўшандан сўнг мен бу иш билан жиддий шуғуллана бошладим. Самарқанд давлат университетида устозларимиз билан кўп меҳнат қилдик. Уларнинг самараси ўлароқ бугун илк ижодий кўргазмам ўтказилмоқда. Ушбу кўргазмани ташкил этишда мени қўллаб-қувватлаган университетимизга миннатдорлик билдираман.

         Кўргазма самимий, кўтаринки руҳда давом этди.

​

Самарқанд давлат университети

Ахборот хизмати.

Шавкат Акрамов олган суратлар.