Болоня университети профессори Морено Тоселли бошчилигидаги италиялик олимлар делегацияси Самарқанд давлат университетига ташриф буюрди. Унга университетнинг қишлоқ хўжалиги ва озиқ-овқат фанлари факультети профессорлари Диана Ди Жиоиа ва Елена Балди ҳамроҳлик қилди.

    Болоня университети делегациясини Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов қабул қилди. Учрашувда СамДУ ва Болоня университети ўртасидаги сўнгги 10 йил давомидаги самарали ҳамкорлик натижалари сарҳисоб қилинди ҳамда келгусидаги режалар белгилаб олинди.

    СамДУ ректори Рустам Холмуродов Марказий Осиё минтақасида озиқ-овқат хавфсизлигини таъминлаш, сув ресурсларидан оқилона фойдаланиш ва экологик мувозанатни барқарорлаштириш устувор вазифалардан эканлигини, Болоня университети билан олиб борилаётган ҳамкорлик бу борада алоҳида ўрин тутишини таъкидлади. Шунингдек, ҳамкорлик доирасида “ақлли қишлоқ хўжалиги” соҳасида кадрлар тайёрланаётгани, яқин истиқболда ушбу йўналишнинг долзарблиги янада ортиши қайд этилди.

    Ўз ўрнида профессор Морено Тоселли СамДУ ва Болоня университети ўртасидаги алоқаларни янада кенгайтириш, Италия қишлоқ хўжалигида қўлланилаётган илғор технологияларни Ўзбекистон шароитига мослаштириш учун етарли имкониятлар мавжудлигини таъкидлади. Шунингдек, СамДУнинг беш нафар талабаси Болоня университетида магистратура босқичида муваффақиятли таҳсил олаётгани қайд этилди ҳамда уларнинг “ақлли қишлоқ хўжалиги” соҳасида етук мутахассис бўлиб етишишига, Ўзбекистон қишлоқ хўжалигини ривожлантиришга муносиб ҳисса қўшишига ишонч билдирилди.

    Ҳамкорлик доирасида СамДУ талабаларининг Болоня университетида магистратура ва докторантура босқичларида таҳсил олиш имкониятларини янада кенгайтириш, шунингдек, қишлоқ хўжалигининг долзарб йўналишларида илмий-тадқиқот ишларини ривожлантириш вазифалари белгилаб олинди.