Milliy tadqiqot universiteti “Oliy Iqtisodiyot Maktabi” (HSE University) – Sankt-Peterburg 2026/2027 o‘quv yilining bahorgi semestrida akademik mobillik dasturi doirasida tahsil olish uchun talabalar nomzodlarini qabul qilishni boshladi.

Mazkur dastur doirasida talabalar 2027-yil 11-yanvardan 30-iyungacha davom etadigan bahorgi semestr mobaynida HSE University – Sankt-Peterburgda tahsil olish imkoniyatiga ega bo‘ladilar. Bahorgi semestr ikki o‘quv modulidan iborat bo‘ladi.

Nomzodlarga qo‘yiladigan asosiy talablar:

  • O‘rtacha o‘zlashtirish ko‘rsatkichi (GPA) – 4,0 ballik tizim bo‘yicha kamida 3,0;
  • ingliz tili darajasi – ingliz tilida o‘qitiladigan fanlarni tanlaydigan talabalar uchun CEFR shkalasi bo‘yicha kamida B2;
  • rus tili darajasi – rus tilida o‘qitiladigan fanlarni tanlaydigan talabalar uchun CEFR shkalasi bo‘yicha kamida C1.

Talabalar o‘z ta’lim dasturi va akademik qiziqishlariga muvofiq rus va ingliz tillarida o‘qitiladigan fanlarni tanlashlari mumkin.

Nomzodlarni taqdim etishning oxirgi muddati – 2026-yil 15-oktabr.

O‘quv fanlarini tanlash

Fanlarni tanlashdan oldin talabalarga HSE University – Sankt-Peterburg kampusida rus va ingliz tillarida amalga oshiriladigan ta’lim dasturlari ro‘yxati bilan tanishish hamda o‘zlari uchun mos ta’lim yo‘nalishlarini aniqlash tavsiya etiladi.

Fanlar katalogidan foydalanishda qidiruv filtrlarida tegishli kampus va akademik yil to‘g‘ri tanlanganiga e’tibor berish lozim.

Akademik mobillik dasturi, ta’lim dasturlari va mavjud o‘quv fanlari bo‘yicha qo‘shimcha ma’lumotlar HSE University’ning rasmiy resurslarida taqdim etilgan.

Foydali havolalar:

HSE University – Sankt-Peterburg akademik mobillik dasturi

Almashinuv dasturi talabalari uchun ma’lumot

HSE University o‘quv fanlari katalogi

Akademik mobillik dasturida ishtirok etishdan manfaatdor talabalar talablarga, mavjud ta’lim dasturlariga va o‘quv fanlari ro‘yxatiga oldindan e’tibor bilan tanishib chiqishlari hamda nomzodlarni taqdim etish jarayonidan o‘tish uchun o‘z vaqtida universitetning Xalqaro hamkorlik boshqarmasiga murojaat qilishlari tavsiya etiladi.