Sharof Rashidov nomidagi Samarqand davlat universitetida har yili iqtidorli talabalar tanlab olinib, ularga ilmiy rahbarlar biriktiriladi. Bugungi kunda 1500 dan ortiq talaba ilmiy-tadqiqot ishlariga jalb qilingan. 2024–2025-o‘quv yilida 958 nafar talaba iqtidorli sifatida saralanib, ularning ilmiy mavzulari tasdiqlandi.

    Iqtidorli talabalar faoliyati muntazam ilmiy seminarlarda, kafedra yig‘ilishlari va fakultet ilmiy kengashlarida muhokama etilib, natijalar ilmiy jurnallarda chop ettirib borilmoqda. Shuningdek, maxsus guruhlar faoliyati yo‘lga qo‘yilib, qo‘shimcha mashg‘ulotlar tashkil qilindi.

    “Yoshlar akademiyasi” faoliyati

    O‘zbekiston Respublikasi Oliy ta’lim, fan va innovatsiyalar vazirining 2023-yil 8-avgustdagi 349-son buyrug‘i ijrosi doirasida universitetda Yoshlar akademiyasi tashkil etildi. Akademiyaning universitet yetakchisi etib Intellektual tizimlar va kompyuter texnologiyalari fakulteti 2-bosqich magistranti, “Innovatsion g‘oyalar yetakchisi” ko‘krak nishoni sohibi Esanov Otabek Olimjon o‘g‘li saylandi. Fakultetlar kesimida ham liderlar belgilandi va ularning tashabbusi bilan talabalarni ilmiy faoliyatga jalb qilish, respublika va xalqaro tanlovlarda ishtirokini ta’minlash bo‘yicha targ‘ibot ishlari olib borilmoqda.

    Fan olimpiadalari va tanlovlarda yutuqlar

    Universitet talabalari muntazam ravishda turli fan olimpiadalari va tanlovlarda ishtirok etib kelmoqda.

  • 2024-yil noyabr oyida Turkmanistonda o‘tkazilgan xalqaro olimpiadada 1 oltin va 2 kumush medal qo‘lga kiritildi.
  • Rossiya RUDN universitetining ekologiya olimpiadasida Geografiya va ekologiya fakultetining 8 nafar talabalari g‘oliblikni qo‘lga kiritdi.
  • Tomsk davlat universitetida o‘tkazilgan xalqaro fan olimpiadasida 3 nafar talaba faxrli o‘rinlarni egallab, mazkur universitetning magistraturasiga muddatidan oldin tavsiya etildi.
  • 2023-yil oktyabr oyida Nukus shahrida bo‘lib o‘tgan Muhammad al-Xorazmiy nomidagi II Xalqaro matematika olimpiadasida universitet jamoasi birinchi o‘rinni qo‘lga kiritdi. Shaxsiy bahslarda 2 talaba oltin, 2 talaba kumush medalga sazovor bo‘ldi.

    Universitetda 58 ta ilmiy va 12 ta maxsus fan to‘garaklari faoliyat yuritib, ularga 2000 dan ortiq iqtidorli yoshlar jalb qilingan.

    Stipendiya tanlovlari natijalari

    O‘zbekiston Respublikasi Prezidenti, Navoiy, Ulug‘bek va Islom Karimov nomidagi Davlat stipendiyalari tanlovida universitet talabalari yuqori natijalarga erishdi:

  • 1 nafar talaba – Prezident Davlat stipendiyasi,
  • 10 nafar – Navoiy nomidagi Davlat stipendiyasi,
  • 2 nafar – Ulug‘bek nomidagi Davlat stipendiyasi,
  • 1 nafar – Islom Karimov nomidagi Davlat stipendiyasi sohibi bo‘ldi.

    2024-yil mart oyida Turkmanistonda o‘tkazilgan OMOUS-24 xalqaro matematika olimpiadasida universitet talabalari 1 kumush va 2 bronza medalni qo‘lga kiritdi.