(POZNAN, POLSHA)

    2026/2027-o‘quv yili, shuningdek, 2026-yilgi qishki semestr uchun Adam Mitskevich universiteti (Poznan sh., Polsha Respublikasi) bilan ikki tomonlama akademik almashinuv dasturiga hujjatlar qabuli boshlanganini e’lon qilamiz.

    Dastur haqida umumiy ma’lumot

    Adam Mitskevich universiteti Polshaning yetakchi oliy ta’lim muassasalaridan biri bo‘lib, xalqaro hamkorlikni faol rivojlantirib kelmoqda. Almashinuv dasturi doirasida talabalarga xalqaro akademik muhitda tahsil olish, kasbiy malakasini oshirish va chet tillarini o‘rganish darajasini yuksaltirish imkoniyati beriladi.

    O‘qish muddatlari

• To‘liq o‘quv yili: 2026-yil 1-oktabr – 2027-yil 4-iyul

• Qishki semestr: 2026-yil 1-oktabr – 2027-yil 16-fevral

• Yozgi semestr: 2027-yil 24-fevral – 2027-yil 4-iyul

    Hujjat topshirish muddatlari

• Universitet tomonidan nomzodlarni ko‘rsatish (nominatsiya): 2026-yil 1-apreldan 30-iyungacha

• Talabalar tomonidan ariza topshirish:

- Erta bosqich: 2026-yil 1-apreldan 10-maygacha;

- Kechki bosqich: 2026-yil 11-maydan 15-iyulgacha.

    Nomzodlarga qo‘yiladigan talablar

    Dasturda ishtirok etish uchun quyidagi hujjatlar to‘plamini taqdim etish lozim:

• Ingliz tilidagi akademik ma’lumotnoma (Transcript of Records);

• Ingliz tili darajasi B2 dan past emasligini tasdiqlovchi sertifikat;

• Xorijga chiqish pasporti nusxasi;

• Belgilangan shakldagi fotosurat;

• To‘ldirilgan va imzolangan ariza-anketa.

    O‘quv jarayonining xususiyatlari

• O‘qitish asosan ingliz tilida olib boriladi;

• 220 dan ortiq o‘quv fanlari mavjud;

• Asosiy mutaxassislikni hisobga olgan holda turli fakultetlardan kurslarni tanlash imkoniyati bor;

• Tavsiya etilgan fanlar soni – 3 tadan 5 tagacha (maksimal – 8 ta);

• Individual o‘quv rejasini (Learning Agreement) kelishish yuboruvchi universitet koordinatori bilan amalga oshiriladi.

    Ishtirok etish shartlari

    Quyidagi majburiy shartlarga e’tibor qaratishingizni so‘raymiz:

• Nominatsiya paytida o‘qish davri (semestr yoki to‘liq o‘quv yili) ko‘rsatilishi shart;

• O‘qish muddatini bir semestrdan ikkinchisiga uzaytirishga yo‘l qo‘yilmaydi;

• Ro‘yxatdan o‘tish va barcha rasmiy yozishmalar faqat nominatsiya paytida ko‘rsatilgan elektron pochta manzili orqali amalga oshiriladi.

Turar joy va ijtimoiy sharoitlar

    Talabalarga universitet yotoqxonasidan joy ajratilishi mumkin (joylar soni cheklangan). Yotoqxonada joy bo‘lmagan taqdirda, ijaraga olingan uyda mustaqil joylashish imkoniyati mavjud.

    Taxminiy yashash xarajatlari:

• Yotoqxona: oyiga 650–1300 PLN;

• Uy ijara haqi: oyiga 1000 PLN dan boshlab.

Talabalar imtiyozlar, jumladan, jamoat transporti uchun chegirmalar beruvchi talabalik guvohnomasi bilan ta’minlanadi.

Qo‘shimcha ma’lumot

Universitetda xalqaro talabalarni qo‘llab-quvvatlash xizmatlari, jumladan, Welcome Centre, Erasmus Student Network (ESN) talabalar tashkiloti hamda ustozlik dasturi (Buddy Program) faoliyat ko‘rsatadi.

Dasturda ishtirok etish uchun universitetning Xalqaro hamkorlik bo‘limiga murojaat qilishingizni so‘raymiz.

Barcha qiziquvchi talabalarni Yevropaning yetakchi universitetlaridan birida tahsil olish va bebaho xalqaro akademik tajriba orttirish imkoniyatidan foydalanishga chorlaymiz.

Yuklab olish