Бугун, 19 июнь куни олий таълим соҳасида дунёнинг энг нуфузли уч рейтинг агентликларидан бири бўлган QS халқаро рейтинг агентлиги QS World University Rankings 2026 натижаларини эълон қилди, унга кўра, Самарқанд давлат университети биринчи марта мазкур нуфузли рейтингга киришга муваффақ бўлди ва 1001-1200 ўринларда эътироф этилди.

    Бу натижа Президентимиз Шавкат Мирзиёевнинг 2022 йил 13 январда қабул қилинган Қарорида белгиланган университетни “2026 йилга қадар халқаро тан олинган ташкилотларнинг олий таълим муассасалари рейтингида биринчи 1000 талик рўйхатга киритиш” бўйича берилган топшириқ ижроси томон қўйилган жуда улкан қадам ҳисобланади.

    Самарқанд давлат университети бу йилги рейтингда бир нечта муҳим индикаторларда ижобий натижаларни қайд этди:

  • Профессор-ўқитувчилар ва талабалар сони нисбати (Faculty Student Ratio): университет ушбу кўрсаткич бўйича 494-ўринни қайд этди.
  • Академик обрў (Academic reputation) кўрсатгичида  534-ўринни эгаллади.
  • Халқаро профессор-ўқитувчилар сони (International faculty ratio) кўрсатгичида 651-ўрин қўлга киритилди.
  • Иш берувчилар орасидаги обрў (Employer reputation): бу йўналишда университет 701-ўринни эгаллади.

    Маълумот учун QS World University Rankings 2026 да иштирок этиш учун дунёнинг 106 мамлакатидан 8467 олий таълим муассасалари ариза берган бўлиб, шундан, 1501 таси рейтингга киритилган. Шу жумладан, Ўзбекистондан 7  университет мазкур рейтингга киришга мувофақ бўлди.

    Рейтингларни ҳисоблашда Scopus базасида индексланган 19.8 миллиондан ортиқ мақолалар ва уларга берилган 200 миллионга яқин иқтибослар таҳлил қилинган. Рейтинг агентлиги ўтказган сўровномаларда 1.5 миллион академик соҳа экспертлари ва 520 мингдан ортиқ иш берувчилар қатнашган.

 

Самарқанд давлат университети

Ахборот хизмати.