Самарқанд давлат университетида "Конденсирланган муҳитлар молекуляр спектроскопиясининг долзарб муаммолари" мавзусидаги VI Халқаро конференция бўлиб ўтди. Ушбу анжуман 1972 --1985 йилларда ректор лавозимида ишлаган, профессор, Ўзбекистон Фанлар академиясининг академиги, Ўзбекистон Республикаси фан арбоби Акбар Отахўжаев таваллудининг 100 йиллигига бағишланди. Конференцияга ўндан ортиқ хорижий мамлакатлардан ҳам таниқли олимлар ташриф буюришди. Анжуманни Самарқанд давлат университети ректори, Ўзбекистон республикаси фан арбоби, Олий Мажлис сенати аъзоси Рустам Холмуродов очди ва академик Акбар Отахўжаевнинг ҳаёти ва илмий фаолияти хусусида маъруза қилди. Ўзбекистон Фанлар академиясининг вице-президенти Саъдулла Раҳмонов анжуман қатнашчиларини табриклади ва нутқ сўзлади. Ўзбекистон Республикаси фан арбоби, АҚШнинг Техас университети профессори, СамДУ Фахрий профессори, Квант маркази илмий раҳбари Анвар Зоҳидовнинг анжумандаги маърузаси иштирокчилар томонидан қизғин кутиб олинди... Академик Акбар Отахўжаевнинг набираси АҚШнинг сунъий интеллект бўйича стартап компанияси инженери Искандар Отахўжаев сўзга чиқиб, хотиралари билан ўртоқлашди. Куннинг иккинчи ярмида Ўзбекистон Республикаси фан арбоби, АҚШнинг Техас университети профессори, СамДУ Фахрий профессори, Квант маркази илмий раҳбари Анвар Зоҳидов, Санкт-Петербург давлат университети профессори Петер Толстой, Жанубий Кореянинг Гwангжу Фан ва технологиялар институти профессори Ҳёнг Сук конференция кун тартибидаги мавзуларда маъруза қилдилар.