Шароф Рашидов номидаги Самарқанд давлат университети ректори Рустам Холмуродовнинг ёшлар, ота-оналар, профессор-ўқитувчилар, нуронийлар ҳамда жамоатчилик вакилларига

МУРОЖААТИ

Азиз, ота-оналар!

    Фарзанд тарбиясида ҳал қилувчи ва энг муҳим, масъулиятли вазифа бу сизнинг вазифангиздир. Халқимиз билиб, кўриб, синовдан ўтказиб айтганидек: “Қуш уясида кўрганини қилади”.

    Авлод давомчиси бўлган ўғил-қизларингизнинг тарбиясига, таълимига бефарқ қараманг.

    Фарзанд, энг аввало, ота-онасининг айтганини қилади. Йўриғига юради. Сиз бундай ваколатингизни ҳеч қачон бировларнинг қўлига бериб қўйманг.

    Фарзандингиз қаерда бўлишидан қатъий назар унинг юриб туришини, ўқишини, атрофдагиларга муносабатини мунтазам назорат қилиб боринг. Фарзандингизнинг дўстлари ким, қизиқишлари қандай, нималарга аҳамият беришигача кўздан қочирманг.

    Фарзандингизда юз бераётган у ижобий бўладими, салбий бўладими, ҳар қандай ўзгаришни чуқур ўрганинг, таҳлил қилинг. Болангизни ўзидан ташқари ўқитувчи ва тарбиячиларидан, дўстларидан, ишхонасидан, яшаш жойидан мунтазам сўраб-суриштиринг.

    Фарзандингизнинг нафақат ҳаётда, балки ижтимоий тармоқлардаги иштирокини ҳам доимий кузатиб боринг.

    Унутманг. Фарзандингизнинг ютуғи сизнинг ютуғингиз, муаммоси эса сизнинг муаммоингиз. Ундаги яхши хислатлардан биринчи навбатда сиз баҳраманд бўласиз. Сиз фойда кўрасиз. Шунинг учун ҳам, фарзандингизнинг таълим-тарбиясини мактабга, институт, университетга ёки муаллим ва домлаларга ташлаб қўйиш жуда катта хато.

    Биринчи навбатда масъулият ва жавобгарликни сиз бўйнингизга олишингиз керак. Бу борада қолганлар сизга кўмакчи.

Азиз фарзандларим, талаба-ёшлар!

    Бугун бутун дунёга таҳдид солаётган бало-қазолар кўп. Сиз уларнинг домига тушиб қолманг. Билиб қўйинг, гиёҳвандликнинг охири фожиа, ғам, кулфат, изтироб.

    Ўйламай ташланган ҳар бир қадам бутун ҳаётингизни остин-устун қилиб юборади. Нафақат ўзингизни, балки яқинларингизни ҳам қайғуга солади. Бир нафар йигит-қизнинг оғир қисмати бутун жамият учун фожиа деб қаралиши керак.

    Бугун нафақат гиёҳвандлик, балки у билан боғлиқ бўлган жиноятлар ҳам ортиб бормоқда. Бундай жиноий тўдалар ёшларимизни нишонга олинаётгани ҳам бор гап.

    Бегона одамлар, тасодифий дўстлар, моддий манфаатдорликлар замирида ҳам ҳеч қачон яхшилик ётмайди. Мабодо сиз шундай йўл қаршисида турсангиз, албатта, ота-онангиз ва устозларингиз билан маслаҳатлашинг. Уларнинг насиҳатларига қулоқ тутинг. Керак бўлса сизнинг ҳақ-ҳуқуларингизни ҳимоя қиладиган давлат-жамият борлигини унутманг.

    Меҳнатнинг айби йўқ. Дарсдан бўш пайтингизда бирор бир юмуш билан шуғулланишингиз мумкин. Лекин, меҳнат муносабатларини қонуний йўлларини қидиринг ва биринчи даржали вазифангиз ўқиш ва илм олиш эканлигини эсдан чиқарманг.

Ҳурматли профессор-ўқитувчилар!

    Глобаллашув замонида талаба-ёшларнинг нафақат билим олиши учун, балки тарбияси учун ҳам масъул эканлигимизни унутмаслигимиз керак. Ҳар бир ёшни ўз фарзандимиз қаторида кўришимиз, уларнинг ҳаётда ўрнини топишига чин дилдан ҳаракат қилишимиз зарур.

    Бу борада бугун таълим даргоҳларида тюторлик лавозимлари жорий этилган. Таълим муассасаларининг ҳар бир ходими талаба-ёшларга меҳр билан қараб, улар учун қайғуриши шарт ва зарурдир.

    Халқимиз билиб айтган: “Бирники мингга, мингники туманга”. Ҳар бир ёшда кузатилаётган хато-камчиликларни ўзимизники деб қарашимиз, уларни бартараф этиш учун бутун кучимизни сарфлашимиз зарур.

    Бу борада таълим муассасаларидаги психологлар фаолиятини ҳам таҳлилий-танқидий жиҳатдан ўрганишимиз муҳим. Замонавий таълим-тарбия усулларини ҳаётга кенг татбиқ қилиш зарур эканлигини англаб етиш вақти аллақачон келган.

Кўпни кўрган тажрибали нуронийлар, маҳалла оқсоқоллари!

    Биз сизнинг ҳам тажрибангизга таянамиз. Сизларни босиб ўтган ҳаёт йўлингиз, ёшларимиз учун ўрнак, ибрат.

    Сиз ҳам болаларимизни турли иллатлардан ҳимоя қилишда бизга кўмаклашинг, қўллаб-қувватланг.

    Ёшларимизнинг таълим-тарбиясига бефарқ бўлмаган жамият аъзоларини ҳам ҳамкорликка, ҳамжиҳатликка чақираман.