Хитойнинг аграр соҳадаги энг нуфузли университетларидан бири саналган Нанжинг қишлоқ хўжалиги университети делегацияси Самарқанд давлат университетига ташриф буюрди. Меҳмонларни СамДУ ректори, Олий Мажлис Сенати аъзоси, профессор Рустам Холмуродов кутиб олди.

    Учрашув давомида СамДУ ректори, Олий Мажлис Сенати аъзоси, профессор Рустам Холмуродов Марказий Осиё минтақасидаги ижтимоий-иқтисодий барқарорлик ва ҳудудий хавфсизлик кўп жиҳатдан озиқ-овқат хавфсизлигига боғлиқ эканлигини таъкидлади. Шу нуқтаи назардан, минтақада аграр таълим ва тадқиқотларни ривожлантириш энг муҳим вазифалардан бири эканлигига алоҳида урғу берилди. Бу борада Хитойда эришилган ютуқлар ва илғор тажрибаларни Марказий Осиё давлатларига, хусусан, Ўзбекистон шароитига мослаштириш орқали амалиётга татбиқ этиш бутун минтақа учун самара бериши таъкидланди.

    Томонлар ўртасида олиб борилган муҳокамалар ва таклифлар асосида Нанжинг қишлоқ хўжалиги университети билан қишлоқ хўжалик экинларининг иқлим ўзгариши стрессларига чидамли навларини яратиш бўйича ҳамкорлик ишлари олиб борилади. Шунингдек, иқлим ўзгариши оқибатида ҳамда мамлакатимизга кириб келаётган янги навлар сабабли касаллик ва зараркунандаларнинг кўпайиб бораётгани, бу эса қишлоқ хўжалиги ишлаб чиқаришига жиддий зарар етказаётгани инобатга олиниб, Нанжинг қишлоқ хўжалиги университети билан экинлар касаллик ва зараркунандаларига қарши курашишнинг илмий асосланган йўлларини ишлаб чиқиш бўйича тадқиқотлар олиб боришга келишиб олинди.