Samarqand davlat universiteti Bitiruvchilar assosiatsiyasining navbatdagi ilmiy-amaliy seminari bo‘lib o‘tdi. Seminarda professor-o‘qituvchilar, bitiruvchilar va universitetning hozirda xalq xo‘jaligining turli sohalarida ishlayotgan sobiq bitiruvchilari, mehnat faxriylari qatnashdilar. SamDU bitiruvchilarini ish bilan ta’minlash, iqtidorli va tashabbuskor talabalarni tadbirkorlik sohasiga olib kirish ushbu tadbirning asosiy maqsadidir.


    Seminarda O‘zbekiston Respublikasi Oliy Majlisi deputati Muhsinjon Xolmuxamedov, professorlar Baxtiyor Xo‘jayorov, Subxon Abbosov hamda Shohrux Jo‘raqulov o‘z chiqishlarida  O‘zbekiston Respublikasi Prezidentining Oliy ta’lim bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risidagi qarorida belgilangan vazifalarning mazmun-mohiyati xususida so‘z yuritdilar. Universitet o‘quv-uslubiy boshqarmasi boshlig‘i Saidazim Samadov  ushbu qaror ijrosini ta’minlash uchun  Samarqand davlat universitetida amalga oshirilayotgan ishlar, jumladan, universitetda tashkil etilgan “Kelajakka qadam” markazining faoliyati, bitiruvchilarni ishga joylashtirish, tadbirkorlikni yo‘lga qo‘yish bo‘yicha ko‘rsatilayotgan uslubiy-amaliy yordamlar to‘g‘risida batafsil ma’lumot berdi.


    Shundan so‘ng assosiatsiya a’zosi Mo‘min Qodirov bitiruvchilar va keng jamoatchilik o‘rtasida hamkorlikni mustahkamlash, bu aloqalarning institusional mexanizmlarni yaratish zarurligi, tayloqlik  mehnat faxriysi Qahhor Nizomov Bitiruvchilar assosiatsiyasi oliy ta’limning hududlardagi ta’lim muassasalari va mahallalar bilan hamkorligini ta’minlashda muhim rol o‘ynashi, yoshlarning iqtidorini namoyon etishda, maktablarda ta’lim sifatini oshirishda muhim ahamiyatga egaligi, mehnat faxriysi, Huseyn Akramov universitet  bitiruvchilarining ta’lim, madaniyat va umuman xalq xo‘jaligi sohalaridagi ibratli faoliyatlarini targ‘ib etish zarurligi haqida gapirdilar. 


    Seminar pirovardida SamDU BA prezidenti Bahodir Sa’dullayev universitet Bitiruvchilari Assosiatsiyasi a’zolariga a’zolik guvohnomalarini tantanali ravishda topshirdi va ularni assosiatsiya faoliyatida faol ishtirok etishlariga da’vat etdi.
    Ilmiy-amaliy seminar qatnashchilarining taklif va tavsiyalari inobatga olinishini va kelgusi faoliyatda qo‘llanilishini ta’kidladi.


Samarqand davlat universiteti

Axborot xizmati.