Subhidam uyg‘onar shoshilib,

Ibodatda uzoq cho‘kar tiz.

Mashriqning ko‘zlari ochilib,

Endi yorug‘ mo‘ralagan kez.

U o‘zini ovutar ishda,

Mashg‘ulotlar o‘tadi - quvnoq.

Qayerdandir, ehtimol, tushdan

Jim kuzatar uni bir nigoh.

Hamma uni quvvatmakon der,

Kulgu desa, shu qizni anglar.

Bilmaslarki, ko‘nglida ko‘p sir,

Kuragida ne paykon zanglar...

U tabassum qiladi mayin,

Ko‘zlariga qalqisa jola.

Baxtli, yolg‘izlangani sayin,

Taqdir ishi - Haqqa havola.

Dars beradi - tarqaydi g‘ashlik,

Va'z o‘qiydi Abadiy Ishq deb.

Xonasida kutar bekaslik,

Sukunatlar - tunlariga zeb.

Nolimaydi, eslatmas o‘zin,

Hech kimsaga saqlamaydi kek.

Unga hamroh matonat, to‘zim,

O‘sha qizning ismi -  YOLG‘IZLIK...

 

Sitorabonu Shomurodova

Samarqand davlat universiteti doktoranti.