Emotsiya his-tuyg‘uga beriluvchan insonlarni hayotimizda ko‘plab uchratamiz. Buning hech yomon tomoni yo‘q, agar bu atrofdagilar bilan munosabatni buzmasa.

    Demak, emotsiya his-tuyg‘ularimizni qanday qilib boshqarishni o‘rganamiz. Asosiy qoida: vaziyatni o‘zgartirolmasangiz, unga bo‘lgan munosabatingizni o‘zgartiring.

    Kayfiyat rasvo paytda, hamma joyni ostun-ustun qilishdan oldin ushbu tavsiyalarni bajarishga urinib ko‘ring:

    Asabiylashishni boshlayotganingizni fahmlashingiz bilan, chuquur nafas olib, oyoq va qo‘l mushaklaringizni taranglashtiring, so‘ng tezda nafasingizni chiqarib yuboring va bo‘shashib tinchlaning. Ushbu mashqni 3 marta takrorlang.

    Ko‘zlaringizni yuming va bir oz bo‘lsada shu holatda o‘tiring. O‘sha damda hayolingizga yomon fikrlar keltirmaslikka xarakat qilsangiz, yana-da yaxshi bo‘lar edi, agar yomon xayollar kelaversa, unda diqqatingizni pozitiv va sokinroq narsalarga qaratishga urinib ko‘ring.

    Jahlingiz chiqgan payt ko‘zgu qarshisiga kelib yuzingiz holatiga qarang, jahl qilishga bo‘lgan ishtiyoqingiz tezda so‘nadi.

    Muvozanatli insonlar eshiklarni qarsillatmaydi, idishlarni sindirmaydi. Ular ohirigacha tinglashadi va birovning gapini bo‘lmaydi. Gapirishga so‘zlari yo‘qligidan emas, shunchaki jahl chiqganda aql ketishini ular juda yaxshi bilishadi.

 

Muxtasam Sulaymonov

Samarqand davlat universiteti

psixologiya va ijtimoiy munosabatlar fakulteti