Ассалому алайкум, азизлар! Ёдингиздами, талаба бўлишингиздан олдинги кунлар? Сизнинг мана шу даргоҳда таълим олиш учун қилган меҳнатингиз, чеккан азобларингиз. Сиз шу вақт аниқ мақсад — олийгоҳга кириш йўлида тинмай меҳнат қилдингиз, китобларга бош эгдингиз. Албатта, бунинг самараси бугунги кунда сиз кўпчиллик ета олмаган, юрагида армон бўлиб қолган бахтга эришдингиз. Кечалари билан дарс тайёрлаб чиқиб, тинмас эдингиз. Бу дамларни ҳечам ёддан чиқармайсиз. Муваффақиятга етган кунингиз-чи? Сизнинг олийгоҳга талаба сифатида қабул қилинган кунингизни ёдга олинг-а! Сизга қанчалик қувонч ҳадя этган шу кун. Ихтиёрсиз ҳолда кўзларингиздан томган маржон ёшлар қалқиб юзингизни нам қилган онлар сиз учун ҳаяжонга тўла дамлар эди. Сизнинг қувончингиз шунча, ота-онангизнинг севинганини, ич-ичидан сиз билан фахрланишини айтмайсиз-ми?

    Гарчи баъзиларингиз шартнома асосида ўқишга кирган бўлсангизда сизга орқа тоғ бўлиб, келажагингиз учун қайғурган ота-онангиз, оилангиздир. Бу катта маблағлар ердан супуриб олинмаётганини жуда яхши биласиз! Бугун талабасиз, сизга четдан туриб ҳавас қилувчилар оз эмас. Сиз етган маррага етолмай, университет остонасидан қайтиб кетганлар қанча. Сиз бу неъматни қадрига етяпсиз-ми? Келажагингиз учун аниқ бир мақсад қўйганмисиз? Шу мақсад йўлида шу кунгача бирор иш қилдингизми? Таълимда замон билан ҳамнафасмисиз? Қайси хорижий тилни ўрганмоқдасиз? Ҳалиям ўйлаб ўтирибсизми? Бунақаси кетмайди! Биласизми, келажак ҳозир қаттиқ меҳнат қилаётганларники, ўз устида тинмай ишлаётганларники! Бошлашдан сира ҳам қўрқманг. Муваффақиятнинг асосий сири бошлашдир. Атрофингизга разм солинг, илм эгаллаш учун барча имкониятлар эшиги очиқ. Ҳаётга реал кўз билан қаранг. Бугунги кунда компютер саводхонлигини пухта эгаллаган, ўз мутахассислигининг билимдони ҳамда бир неча хорижий тилларни мукаммал эгаллаган ходимларга бўлган талаб юқори. Шу тўрт йил давомида сиз кўп натижаларга эришишингиз мумкин. Бу сизга боғлиқ. Ҳар бир кунингизни режа асосида ўтказинг. Кўпроқ китоб мутолааси билан машғул бўлинг. Бу жараён сизнинг дунёқарашингизни бойитиб боради. Вақтим йўқ, имкониятим йўқ каби баҳоналар билан ўзингизни алдаманг. Инсон чин дилдан истаса, барчасига улгура олади. Шуни унутмангки, бу тўрт йиллик олийгоҳдаги вақтингиз сизга қайта берилмайди, худди болалигингизни қўмсайсиз-у унга қайтиб боролмайдиган ҳолатдек. Олийгоҳ ҳам таълим-тарбия маскани. Унга кирдингизми, яна шу аввалги билим билан қайтиб чиқиб кетманг. Бу худди сувга кириб ювинмай чиқишга тенг. Ҳар лаҳзаси олтинга тенг бўлган умрингизни, сизга фойдаси тегмайдиган “ижтимоий тармоқлар”га сарфлашни бас қилинг. Талабаларда масъулияцизлик, бепарволик уларнинг вужудига сингиб бормоқда. Бу ҳолатлардан чиқиб, ўз келажагингиз учун курашинг. Дангасалик қилманг, доимо ҳаракатда, илм олиш пайида бўлинг. Биласиз-ми? Тўхтаганни ўтиргиси келади, ўтирганни ётгиси, ётганни эса ухлагиси келади. Ғафлатда қолиб орзуларни тушингизда кўрганингиз маъқулми ёки илм эгаллаш заҳмати ортидан келадиган натижаларингизни ҳаётда кўрганингизми??? Мен сизга ишонаман. Сиз-чи?

    Инсон истаса, у барча ишга қодир. Дастлаб қийналяпсизми? Бу бир тизимга кириб олгунингизча бўлган қисм. Қийин экан, эплай олмаяпман дея бирдан қарор чиқарманг. Яна бошидан бошланг, қайтадан уриниб кўринг. Кузатгансиз, бола ҳам юришни ўргана туриб бир неча бор йиқилиб тушади. Аммо, ҳар йиқилганида “юриш менинг қўлимдан келмайди, мен учун эмас”-дея ярим йўлда ташлаб кетмайди. Ҳаракат қилади ва охири юриш у ёқда турсин, ЮГУРИШни ҳам ўрганиб олади. Хулоса ўзингиздан, бир болакайдек ҳаракат қилолмасангиз, сизни қандай қилиб талаба деб аташ мумкин! Инсон осонига интилади, осон келган нарсалар осон кетишини унутманг. Бу инкор этиб бўлмас ҳақиқат.

    Келинг, келажагимиз учун формула яратамиз:

    Аниқ мақсад→пухта режа→ҳаракат→ғалаба→КЕЛАЖАК СИЗНИКИ!

    Билимсиз ақлнинг чанги бўлади, илм-ла эговла янги бўлади.

    Ойнадан ибрат ол бир кун артмасанг, устида бир энлик чанги бўлади.

    Азизлар, Бедилнинг ушбу фикрларидан ибрат олинг, чархланган илм эгаси доим ўз ўрнини топади. Унда ОЛҒА !!!

Ҳилола Саидова

Самарқанд давлат университети

филология факультети магистранти