Самарқанд давлат университетининг «Академик Толиб Муминов номидаги Ядро физикаси лабораторияси» (ЯФЛ СамДУ) 1983 йилда академик Муминов Толиб Мусаевич ташаббуси билан қурилган. Ҳозирги кунда ядро физикаси лабораторияси мудири лавозимида Сафаров Аскар Нариманович фаолият олиб бормоқда. Лабораториянинг умумий майдони 15 гектар бўлиб, бинолар жойлашган майдон 2700 квадрат метрдан ошади. 2003 йилдан бошлаб лаборатория «ноёб объект» сифатида молиялаштирилиб келинмоқда.
Самарқанд давлат университети «Академик Толиб Муминов номидаги Ядро физикаси лабораторияси»нинг 2021 йилдаги фаолияти асосий натижалари:
    1.Хорижий грантлар бўйича қуйидаги ишлар бажарилди:
    •МАГАТЭнинг Узб-0006 “Building Capacity in the Peaceful Use of Nuclear Science and Technologies at the National University of Uzbekistan and the Samarkand State University” лойиҳаси бўйича ишлар давом эттирилди. Лойиҳани молиялаштиришнинг умумий миқдори 260 000 еврони ташкил этади. Ушбу лойиҳа доирасида 95 000 евролик ускуналар олинди ва 25 000 еврога қўшимча жиҳозлар буюртма қилинди;
    •АҚШнинг Ўзбекистондаги элчихонаси томонидан молиялаштирилган Central Asia University Partnership Program (UniCEN) дастури доирасида “Co-Developement and Cross-Pollination of Effective, Hands-On Nuclear Physics Educational Activities” лойиҳаси бўйича ишлар якунланди. Лойиҳа QS World университетлар рейтингида 1 ўринни эгаллаган Массачусетс технология институти (АҚШ) билан ҳамкорликда амалга оширилди. Лойиҳа бюджети 39 136 АҚШ долларини ташкил этади.
    2. Ўзбекистон Республикаси Фанлар академияси қошидаги Ядро физикаси институти билан биргаликда қуйидаги ишлар амалга оширилди:
    •ЎзР ФА ЯФИ ва “ЎЗГАШКЛИТИ” давлат унитар корхонаси ўртасидаги келишув доирасида Жиззах вилоятидаги АЭС қурилиши ҳудудида радиоэкологик мониторинг ишлари олиб борилди. Шартнома рақами
РЛТ-120-2021;
    •ЎзР ФА ЯФИ ва «Безопасность и контроль» МЧЖ ўртасидаги келишув доирасида Самарқанд вилоятидаги Кўмир ЭС қурилиш ҳудудида радиоэкологик тадқиқотлар олиб борилди. 2021 йил 1 июндаги
РЛТ-095/2021-сонли шартнома;
    •ЎзР ФА ЯФИ ва «Безопасность и контроль» МЧЖ ўртасидаги келишув доирасида Қорақалпоғистондаги Тебинбулоқ рудаларни бойитиш комбинати қурилиш зонасида радиоэкологик тадқиқотлар олиб борилди. 2021 йил 1 июндаги РЛТ-096/2021-сонли шартнома;
    •ЎзР ФА ЯФИ ва «Безопасность и контроль» МЧЖ ўртасидаги келишув доирасида Жиззах вилояти Ғаллаорол туманидаги Металлургия комбинати қурилиш зонасида радиоэкологик тадқиқотлар олиб борилди. Шартнома рақами РЛТ-097/2021;
    •Мева-сабзавотларни радиaциявий дезинфекция қилиш ва тиббиёт маҳсулотларини радиaциявий стерилизatsiя қилиш лойиҳасини техник-иқтисодий асослаш бўйича ишлар олиб борилмоқда;
    •Озиқ-овқат маҳсулотлари, қурилиш материаллари ва ичимлик суви намуналарининг радиaцион хавфсизлигини таҳлил қилиш бўйича илмий ишлар олиб борилмоқда.
    3. «Бирлашган Ядро тадқиқотлар институти» (Дубна ш., Россия) билан ҳамкорликда ядровий электроника ва паст активликдаги экологик намуналарни ўлчаш бўйича ўқув курсларини яратиш ишлари олиб борилмоқда.
    4. Беларус Миллий фанлар академиясининг «Бирлашган энергетика ва ядровий тадқиқотлар институти – Сосни» билан ҳамкорликда табиий сувлардаги радон миқдорини тадқиқ қилиш ишлари олиб борилмоқда.
    5. Украина Гидрометеорология институти (Киев ш.) билан биргаликда хавф даражаси юқори ҳудудларда атроф-муҳит намуналарининг радиоактивлигини ўлчашнинг самарали усулларини қўллаш бўйича илмий изланишлар бошланган.
    6. МАГАТЭ грантлари ҳисобидан ташкил этилган 5 та илмий ва ўқув лабораторияларида 170 дан ортиқ талаба ва 20 нафар магистрант лаборатория машғулотлари олиб бормоқда.
    7. Ҳозирги кунда лабораториянинг 3 нафар ёш мутахассиси Хитой (Institute of Modern Physics, Ланчжоу ш.), Россия (МИФИ, Москва ш.) ва Беларус (ОИЭЯИ-Сосны, Минск ш.)да аспирантурада ўқишни давом эттирмоқда.
    8. Ўзбекистон Республикаси Саноат хавфсизлиги давлат қўмитасининг ионлаштирувчи нурланиш манбаларини сақлаш ва улардан фойдаланиш ҳуқуқини берувчи муддатсиз лицензияси олинди (13.04.2021 й. 158-сон).
    9. Лабораториянинг 2 нафар ходими физика-математика фанлари йўналиши бўйича PhD диссертaцияларини ҳимоя қилди.
    10. Лабораторияда олиб борилган тадқиқотлар асосида 9 та магистрлик диссертaцияси ҳимоя қилинди.
    11. Жорий йилда МАГАТЭ гранти ҳисобидан лабораториянинг 2 нафар ходими Россия (ОИЯИ, Дубна ш.), Украинада (Укргидромет, Киев ш.) 2 ойлик тренингдан ўтди, шунингдек, 1 нафар ходим Хорватияга (Рудер Бошкович институти, Загреб ш.) 2 ҳафталик илмий сафар уюштирди. Бундан ташқари 2022 йилнинг январь − май ойларида яна 1 нафар ходим Массачусетс технология институтида (МИТ, Кембриж, МА, АҚШ) 4 ойлик амалиёт ўтайди.
    12. Жорий йилда илмий журналларда 6 та мақола чоп этилган, шундан 3 та мақола SCOPUS маълумотлар базасида индексланган журналларда. Шу билан бирга халқаро ва республика конференциялари материалларида 9 та мақола ва тезислар чоп этилган. Бундан ташқари 4 та мақола илмий журналларда чоп этишга юборилган.
    Лаборатория бинолари ва инфратузилмаси 2020 йилда 6,1 миллиард сўмга реконструкция қилинди    1 расм. СамДУ ядро физикаси лабораториясининг умумий кўриниши    2 расм. СамДУ »Академик Толиб Муминов номидаги Ядро физикаси лабораторияси»нинг бош биноси.    3 расм. Ер ости тезлатгичлар зали.

    4 расм. Тадқиқотлар ўтказишга мўлжалланган 300 метрлик ер ости канали.

(МИТ профессори Майк Шорт ташрифи, 2021 йил август ойи)

    ​Ўзбекистонда биринчи атом электр стансияцининг қурилиши муносабати билан СамДУ ЯФЛ фаолиятининг энг муҳим йўналиши ядро физикаси соҳасида юқори малакали кадрлар тайёрлаш жараёнини такомиллаштиришдан иборат. Ўзбекистон Республикаси Президентининг 02.07.2019 йилдаги «2019 – 2029 йилларда Ўзбекистон Республикасида атом энергетикасини ривожлантириш консепциясини тасдиқлаш тўғрисида»ги ПҚ-4165-сон, 16.10.2019 йилдаги «Ўзбекистон Республикасининг ядро-энергетика дастури учун кадрлар салоҳиятини ривожлантириш стратегиясини тасдиқлаш тўғрисида»ги ПҚ-4492-сон қарорлари ва Ўзбекистон Республикасининг 09.09.2019 йилдаги «Атом энергиясидан тинчлик мақсадларида фойдаланиш тўғрисида»ги ЎРҚ-565-сонли қонунида атом энергетикаси ва ядро технологиялари соҳасида кадрлар тайёрлаш вазифалари белгиланган. Мазкур ҳужжатларда Ўзбекистон Миллий университети ва Самарқанд университети олдига ядро физикаси йўналиши бўйича таълим стандартларини жаҳоннинг илғор университетлари амалиётига мос равишда такомиллаштириш вазифаси қўйилган.

    Юқоридаги вазифаларни бажариш мақсадида СамДУ ЯФЛда умумий қиймати 1 миллион АҚШ доллари миқдоридаги хорижий грантлар жалб этилган ҳолда илмий асбоб-ускуналар билан жиҳозлаш сезиларли даражада яхшиланди ҳамда қуйидаги 5 та илмий ва ўқув лабораториялари ташкил этилди:

  1. Атом физикаси лабораторияси.

  2.  Ядро физикаси лабораторияси.

  3. Ядро реакторлари физикаси лабораторияси.

  4. Ядро электроникаси лабораторияси.

  5. Дозиметрия ва радиоэкология лабораторияси.

     Ушбу лабораторияларда ҳар йили 170 нафардан ортиқ талаба ва 20 нафар магистрантлар лаборатория амалиёти бажарадилар. Шу билан бирга магистрантлар, докторант ва тадқиқотчилар илмий изланишларини олиб борадилар.      5 расм. Ядро электроникаси лабораторияси

               

6 расм. Атом физикаси лабораторияси

Сўнгги йилларда лаборатория ходимлари хорижий илмий марказларда, хусусан Триест (Италия), Суррей ва Ливерпул (Буюк Британия), Юваскула (Финляндия), Загреб (Хорватия) университетилари, Зайберсдорф (Австрия) шахридаги МАГАТЭ лабораторияси, Ломоносов номидаги Москва давлат университети, ОИЯИ (Дубна, Россия), Доунрей (Шотландия) марказларда ўз малакаларини ошириб келган. Жорий йилда МАГАТЭ гранти ҳисобидан лабораториянинг 2 нафар ходими Россия (ОИЯИ, Дубна), Украина (Укргидромет, Киев)да 2 ойлик тренингдан ўтди, шунингдек, 1 нафар ходим Хорватия (Рудер Бошкович институти, Загреб)га 2 ҳафталик илмий сафар уюштирди.

Самарқанд давлат университети «Академик Толиб Муминов номидаги Ядро физикаси лабораторияси»га академик Муминов Толиб Мусаевич 2021 йил декабрга қадар илмий рахбарлик қилган. Лабораторияда 6 нафар фан номзоди доимий штат бирлигида фаолият кўрсатади. Жорий йилда ЯФЛ базасида СамДУ «Ядро физикаси» кафедрасининг 3 нафар докторанти, 2 нафар тадқиқотчиси, 19 нафар магистранти ва 15 нафар талаба илмий тадқиқот ишларини олиб борди.
Айни пайтда СамДУ ЯФЛ жамоаси олдида 35 йилдан буён ишлаган жисмоний ва маънан эскирган тезлаткичларни алмаштириш вазифаси турибди. Талаб қилинадиган сармоя 3 миллион АҚШ долларидан ошади. Ушбу масалага университет ректори проф. Р.И.Халмурадов, Ўзбекистон Республикаси Фанлар академияси президенти Б.С.Йўлдошев ва Самарқанд вилояти ҳокимлиги жиддий эътибор қаратишмоқда.